न्यूटन: लोकशाही आणि कर्तव्याची आकर्षक कथा

 

"न्यूटन" हा अमित व्ही. मसुरकर दिग्दर्शित हिंदी भाषेतील उल्लेखनीय ब्लॅक कॉमेडी ड्रामा चित्रपट आहे. हा चित्रपट मुख्य चार पात्रांभोवती फिरतो.  मुख्य भूमिकेत राजकुमार राव (नूतन कुमार - न्यूटन ) पंकज त्रिपाठी सहाय्यक कमांडंट आत्मा सिंग, रघुबीर यादव लोकनाथच्या भूमिकेत आणि मलको नेतामच्या भूमिकेत अंजली पाटील. नूतन कुमारला त्याचे नाव फारसे आवडत नसते त्यामुळे तो स्वतःचे नाव बदलून न्यूटन असे ठेवतो. 

चित्रपटाची मांडणी आणि निर्मिती रचना छत्तीसगडच्या घनघोर जंगलात चित्रित करण्यात आलेली आहे. लोकशाही टिकवून ठेवण्यासाठी जबाबदार असलेल्यांना भेडसावणाऱ्या आव्हानांचे वास्तववादी चित्रण या चित्रपटात केलेले आहे तसेच भारताच्या काही भागांमध्ये प्रचलित असलेल्या सामाजिक-राजकीय समस्यांवर प्रकाश टाकण्याचा प्रयत्न यातून केलेला आहे.या चित्रपटाची कथा आव्हानात्मक परिस्थितीत सुव्यवस्था राखण्यासाठी आणि निष्पक्ष निवडणुकापार पाडण्यासाठी सरकारी अधिकाऱ्यांनी केलेल्या संघर्षांवर प्रकाश टाकते. संपूर्ण कहाणी विनोद आणि आत्मनिरीक्षण यांचा उत्तम मिलाफ आहे.

हा चित्रपट आपल्याला नूतन  कुमार नावाच्या सरकारी नोकराच्या जगात  घेऊन जातो, ज्याला निवडणुकीच्या वेळी मध्य भारतातील राजकीयदृष्ट्या अस्थिर प्रदेशात नियुक्त केले जाते त्याला तिथे  मुक्त आणि निष्पक्ष निवडणुका घेण्याच्या प्रयत्नात असंख्य आव्हाने आणि अडथळ्यांचा सामना करावा लागतो. बंडखोरीग्रस्त जंगलांच्या पार्श्‍वभूमीवर, न्यूटनला युद्धात कंटाळलेल्या केंद्रीय राखीव पोलिस दलाची (CRPF) उदासीनता आणि कम्युनिस्ट बंडखोरांच्या गनिमी हल्ल्याची भीती यांचा सामना करावा लागतो. या कठीण परिस्थितीतही, तो आपले कर्तव्य पार पाडण्यासाठी आणि लोकशाही प्रक्रियेतून योग्य उमेदवार निवडून यावा आणि यात गावकऱ्यांचा मतदानरूपी सहभाग असावा यासाठी शेवट पर्यंत प्रयत्नांची पराकाष्ठा करतो.  

राजकुमार राव याने नेहमीप्रमाणेच  दमदार अभिनयाने अफलातून  कामगिरी केली आहे. सरकारी लिपिक म्हणून त्याने  केलेल्या भूमिकेतील संघर्ष, जिद्द आणि अतूट बांधिलकी त्याने प्रभावीपणे सादर केली आहे. त्याच्या व्यक्तिरेखेतील गुंतागुंत आणि त्याच्या कर्तव्याप्रती त्याची अटळ बांधिलकी या चित्रपटात सुंदरपणे टिपली आहे. पंकज त्रिपाठी सहाय्यक कमांडंट आत्मा सिंग याच्या भूमिकेत असतात, कर्तव्य आणि सहानुभूती यांच्यात फाटलेल्या एका थकलेल्या अधिकाऱ्याचे सूक्ष्म चित्रण ते यथायोग्यपणे आपल्या समोर मांडतात तसेच अंजली पाटील आणि रघुबीर यादव यांच्या उत्तम अभिनयाने चित्रपटाला एका वेगळ्या उंचीवरती नेऊन ठेवले आहे. 

चित्रपट सुरुवातीपासूनच एक निश्चित वेग धारण करतो. केंद्रीय राखीव पोलीस दल (CRPF) ची उदासीनता आणि त्यांची कट कारस्थाने विनोदी रूपाने परंतु गंभीर मेसेज देऊन जातात. चित्रपटाची पटकथा विनोदी आणि नाटकीय घटकांना कुशलतेने संतुलित करते, ज्यामुळे चित्रपट मनोरंजक आणि विचार करायला लावणारा बनतो.  अमित व्ही. मसुरकर यांचे दिग्दर्शन प्रशंसनीय आहे, तसेच चित्रपटाचे संपादन इतके छान आहे कि प्रेक्षक शेवटपर्यंत तल्लीन होऊन चित्रपट बघतात. सिनेमॅटोग्राफरणे  सभोवतालचे सौंदर्य अतिशय समर्पक कॅप्चर केले आहे, त्यामुळे कथानकाला अधिक सत्यता प्राप्त झाली.

 

देशाला स्वातंत्र्य मिळून ७० हुन अधिक वर्ष उलटली असली तरीही देशाच्या अनेक भागात अजूनही मतदानाचा हक्क व निवडणूक प्रक्रियेबद्दल लोकांना   जाणीव आणि समज नसल्याचे या चित्रपटातून सिद्ध होते.लोकशाहीचे स्वरूप, मतदानाचे महत्त्व आणि त्याची अंमलबजावणी करताना येणाऱ्या आव्हानांबद्दल हा चित्रपट हुशारीने आपल्यासमोर प्रश्न उपस्थित करतो.

 "न्यूटन" ला समीक्षक आणि प्रेक्षक या दोघांकडूनही चांगली प्रशंसा मिळाली. या चित्रपटाला हिंदीतील सर्वोत्कृष्ट वैशिष्ट्यपूर्ण चित्रपटासाठी राष्ट्रीय चित्रपट पुरस्कार मिळाला आणि 90 व्या अकादमी पुरस्कारांमध्ये सर्वोत्कृष्ट परदेशी भाषा चित्रपट श्रेणीसाठी भारताची अधिकृत प्रवेशिका म्हणून याच चित्रपटाची निवड करण्यात आली. राजकुमार रावच्या अपवादात्मक कामगिरीमुळे त्याला या चित्रपटासाठी सर्वोत्कृष्ट अभिनेत्याचा एशिया पॅसिफिक स्क्रीन अवॉर्ड मिळाला, ज्यामुळे अभिनेता म्हणून त्यांची प्रतिभा आणि अष्टपैलुत्व अधिक दृढ झाले.

"न्यूटन" हा लोकशाही, कर्तव्य आणि मानवी भावविश्वातील गुंतागुंतीचा वेध घेणारा चित्रपट आहे. हा सिनेमा उत्कृष्ट कामगिरी, लक्षवेधी पटकथा आणि उत्कृष्ट दिग्दर्शनासह, संघर्षग्रस्त भागात लोकशाही प्रक्रिया टिकवून ठेवण्यासाठी येणाऱ्या आव्हानांचा शोध घेतो आणि कोणत्याही  प्रतिकूल परिस्थितीत लोकशाही मूल्ये जपली पाहिजेत याची आठवण करून देतो.  सामाजिक मूल्याधारित प्रश्न आणि त्याचे सूक्ष्म अन्वेषण करण्याची आवड असणाऱ्या लोकांनी हा चित्रपट जरूर पाहावा.